விஷ்ணு விஷால் நடிப்பில் கடந்த ஆண்டு வெளி வந்த ‘ராட்சசன்’ திரைப்படம் வெளிநாட்டில் 4 விருதுகளை குவித்துள்ளது. ராம்குமார் இயக்கத்தில் விஷ்ணு விஷால் நடிப்பில் கடந்த ஆண்டு அக்டோபர் 5ம் தேதி வெளியான படம் ராட்சசன் இந்த படத்தில் அமலா பால் கதாநாயகியாக நடித்துள்ளார். சைக்கோ த்ரில்லர் பாணியில் வெளியான இப்படம் ரசிகர்கள் மத்தியில் நல்ல வரவேற்பைப் பெற்றது என்பது குறிப்பிடத்தக்கது.
அதுமட்டுமின்றி விஷ்ணு விஷால் கேரியரில் இந்த படம் மிகப்பெரிய திருப்புமுனையை ஏற்படுத்தியுள்ளது என்று கூட சொல்லலாம்.ராட்சசன் படம் பல்வேறு விழாவில் கலந்து கொண்டு விருதுகளை பெற்றது. இந்த நிலையில் சமீபத்தில் அமெரிக்காவில் லாஸ் ஏஞ்சலிஸ் நகரில் நடைபெற்ற திரைப்பட விழாவில் (LAFA) ராட்சசன் படம் கலந்து கொண்டது.
அதில் சிறந்த ஆக்ஷன் திரைப்படம் விருது, சிறந்த நடிகர் விருது, சிறந்த த்ரில்லர் விருது, சிறந்த பின்னணி இசை என்று நான்கு விருதுகளை ‘ராட்சசன்’ திரைப்படம் அள்ளி குவித்திருக்கிறது. இந்த படம் வெளியாகி இன்றுடன் ஒரு வருடம் ஆகியுள்ளது என்பது குறிப்பிடத்தக்கது. அதனால் இது குறித்து விஷ்ணு விஷால் ட்வீட் செய்துள்ளார். அதில், ‘கடந்த ஆண்டு இந்த நாளில் நான் மிகவும் உற்சாகமாக இருந்தேன். ராட்சாசன் வெளியீட்டிற்காகப் பதற்றமடைந்தேன்.சில சமயத்தில் நாம் செய்ய வேண்டியது எல்லாம் நேர்மறையாக இருப்பதை, பாசிட்டிவாக எடுக்க வேண்டும். வாழக்கையை அதன் போக்கில் எடுத்துக் கொள்ளுங்கள். உங்கள் அன்புக்கும், ஆதரவிற்கும் நன்றி’ என்று குறிப்பிட்டுள்ளார்.
